González Sanz dexa’l so cargu de conceyala pa ser direutora xeneral d’Igualdá y Diversidá

Irene Montero, ministra d’Igualdá, apuesta por Alba González Sanz pa ocupar el cargu de direutora xeneral d’Igualdá de Tratu y Diversidá Étnico-racial. Edil por Podemos-EQUO, va abandondar la Casa Conceyu, siendo’l so sustitutu Juan Miguel Chaves.

Nacida n’Uviéu nel 1986, esta escritora y investigadora feminista ocupó’l númberu 3 de la llista de la coalición a les eleiciones del 26 de mayu tres Yolanda González Huergo y Laura Tuero. Doctora en Xéneru y Diversidá, col nomamientu de Montero al frente de la cartera d’Igualdá del Gobiernu estatal de coalición ente PSOE y Xuníes Podemos, pasa a ocupar el cargu de direutora xeneral pa la Igualdá de Tratu y Diversidá Étnico-racial, creada na llexislatura anterior con Ignacio Sola al frente.

La vacante que dexa González Sanz nel grupu municipal de Podemos-EQUO va cubrila Chaves, númberu 4 de la llista. Natural de Ribeseya, foi coordinador del grupu municipal de Xixón Sí Puede na llexislatura anterior y vien trabayando en Podemos Xixón dende la so fundación.

Na semeya, González Sanz, primera pela derecha, nel salón de plenos de la Casa Conceyu xunto coles sos compañeres González Huergo y Tuero.