II Concursu Xixón Fala en 3: Galán y Álvarez Costales, ganadores

Esti sábadu 14 d’avientu cellebróse nel Salón d’Actos del Centru de Cultura Antiguu Instututu’l II concursu Xixón Fala en 3, que consistió nuna competición, n’asturianu dafechu, onde se presentaron temes, idees, investigaciones con munchu procuru y con bona calidá llingüística énte un públicu non especializao, xeneralista y variao.

Ofrecióse a la ciudadanía una ocasión única pa perfeicionar les sos aptitúes de comunicación n’asturianu, pa emplegar l’asturianu en cualesquier estaya y rexistru y pa participar nun eventu col que van s’algamaren cotes altes de prestixu y normalización en tola comunidá asturfalante.

El xuráu,presidíu por D. Alberto Ferrao Herrero (Conceyal d’Educación y Cultura del Conceyu de Xixón), y compuestu por Dña Marta Mori de Arriba (Vicepresidenta de l’Academia de la Llingua Asturiana), D. Ramón d’Andrés Díaz (profesor titular del Departamentu de Filoloxía Española de la Universidá d’Uviéu), D. Antón García, (Direutor Xeneral de Política Llingüística) y Dña. Mª Xosé Rodríguez López, (Responsable de la Oficina de Normalización Llingüística), qu’actuó como secretaria; tres d’emponderar la calidá y bayura de los temes presentaos, valoró tanto la calidá espositiva y la capacidá de síntesis como la calidá llingüística, la oratoria y la capacidá de comunicación de les persones participantes, amás de comprobar que delles persones participantes quedaben escluyíes al perpasar el tiempu tope que s’esplicitaba nes bases del concursu.

Poro, pa poner el ramu a esti añu 2019 préstanos enforma poder dar anuncia de les persones ganadores del II Concursu Xixón Fala en 3:

Estaya A: temes venceyaos a la cultura y la realidá asturiana:

Primer Premiu: Inaciu Galán y González con “L’asturianu nel franquismu: Amigos del Bable”

Segundu Premiu: Dolfo Camilo Díaz con “Asturies: el mieu a la diferencia”

Tercer Premiu: ermu.

Estaya B: temes de divulgación:

Primer Premiu: Marcos Antonio Álvarez Costales con “Privacidá n’Internet”

Segundu Premiu: Sergio Manuel Buelga Casas con “Isabella Andreini: la Commedia dell Arte al serviciu de la muyer”

Tercer Premiu: Claudia Gutiérrez Lueje con “Viaxar n’autocaravana”

Estaya C: La mocedá fala en 3:

Primer Premiu: Celia Corrales García con “Salú mental: la importancia de lo invisible”