Reclamen la presencia del topónimu tradicional sobre'l parqué del Palaciu

El pliegu de condiciones de la obra d'instalación del parqué nuevu del Palaciu de Deportes namái recueye la incorporación del topónimu castellanizáu de la ciudá, 'Gijón', según Iniciativa pol Asturianu. Demanda qu'apaeza tamién el tradicional 'Xixón'.

Nel puntu 6, que se refier al 'Pintáu de les llinies de xuegu y serigrafiáu de la pista', el Patronatu Deportivu Municipal apunta que "inclúiranse dos serigrafíes del logu de 'gijón', según l'archivu en pdf y jpg que s'axunta". Hasta la fecha, los dos únicos logos presentes sobre el parqué yeren los de la versión del topónimu castellanizáu.

"A pesar de que’l procedimientu de presentación d’ufiertes va terminar dientro d’una selmana, la organización pide la retramitación de la ufierta pa incluyir la denominación oficial", apunten dende Iniciativa pol Asturianu. Ésta anguaño ta ausente nel Palaciu "tanto nel parqué como nes valles llaterales".