Ríos de Xixón

El ríu de Xixón más conocíu ye, ensin llugar a duldes, el Piles. La so desaguada na sablera de San Llorienzu y, sobre manera, el venceyu qu'hai na mente de tolos xixoneses con El Molinón, faen a esti ríu un emblema de Xixón. Amás, la portería del Piles ye "la de los goles" pa los aficionaos roxiblancos más veteranos.

Sicasí, el conceyu cuenta con otros munchos ríos y regueros que van a ellos. Na zona oeste tenemos l'Aboñu, que fai llende con Carreño, mentes que nel este'l Piles ye'l más importante, anque nun fai llende, yá qu'esta función cúmplela'l Ñora, un regatu que desagua na sablera de mesmu nome. Otros ríos que trescuerren per Xixón son el Pinzales y el Pilón, amás del Cutis, soterráu y xuníu a esti últimu por necesidaes urbanístiques pa evitar inundaciones.

Tamién son numberosos los regatos, como'l Meredal, el Llantones, el Tremañes, el San Miguel, el Peña Francia, el Lloreda, el Veranes o'l La Braña, asina como los manatiales. Otra manera, el conceyu cuenta con un banzáu, en San Andrés, construyíu nel 1964 p'abastecer a la siderúrxica Uninsa, anguaño ArcerlorMittal.