El Conceyu permite otra vegada’l bañu en San Llorienzu tres dos díes de prohibición

L’análisis negativu de contaminación de les muestres tomaes polos bomberos na desaguada del ríu Piles llevó al Conceyu a reabrir el bañu en San Llorienzu. Per dos díes tuvo prohibíu ente les escaleres 11 y 15 tres l’apaición de pexes y un ave muerta.

El llunes foi’l día nel que se vieron siete exemplares de pexe y un ave muerta, lo que llevo a la conceyalía de Mediu Ambiente y Movilidá a decretar una prohibición preventiva del bañu nel tramu de sablera más cercana al puente’l Piles. Nesa mesma xornada los bomberos tomaron delles muestres pa ser analizaes, resultaos que se conocieron esta mañana.

Éstos dieron negativos, polo que’l Conceyu llevantó la prohibición al bañu depués de dos díes nos que l’ausencia de sol evitó la presencia de bañistes na principal playa de la villa, anque entovía queda por conocer el resultáu del análisis fechu pola Empresa Municipal d’Agües de Xixón (EMA), más rigurosu que’l de los bomberos, previstu pa mañana. La falta d’oxíxenu pol caudal escasu y la presencia de material orgánicu en descomposición podría ser la razón de les muertes, según apuntó’l conceyal Aurelio Martín ayeri.

Semeya obra de Lamatosa baxo llicencia CC BY-SA 4.0.