Prohibíu’l bañu ente les escaleres 11 y 15 tres l’apaición de pexes y un ave muertos

La playa de San Llorienzu ta zarrada al bañu ente les escaleres 11 y 15. L’apaición de peces muertos y un ave na desaguada del ríu Piles lleva al Conceyu a tomar esta midida de manera preventiva hasta que se conoza’l resultáu del análisis del agua tomada nesta zona.

La decisión tomóse na tarde d’ayeri tres comprobar la esistencia de siete pexes muertos y un ave na sablera principal de la villa. Salvamentu punxo la bandera colorada nuna xornada que, sicasí, nun llamaba al bañu pol mal tiempu.

La midida va caltenese a lo llargo de güei y mañana, hasta que se tengan los resultaos de l’analítica, según confirmó’l conceyal de Mediu Ambiente y Movilidá, Aurelio Martín. L’edil de Xixón pela Izquierda avanzó que pretende facer un análisis más fondu de la calidá del agua del Piles nos meses próximos y aseguró que tien sospeches d’arramaos al ríu, anque nesti casu paez que la razón de la muerte de los animales ye la falta d’oxíxenu al haber materia orgánica en descomposición nun procesu natural.

Semeya obra de Ramón de la Fuente baxo llicencia CC BY-SA 3.0.