La Fiesta de la Sidra Natural presenta cartelu, nel que desapaez l'asturianu

La diseñadora gráfica xixonesa Noelia Pañeda (Pasajero 37) encargóse dar forma al cartelu de la próxima edición de la Fiesta de la Sidra Natural, que se va celebrar del 19 al 25 de agostu. La creación dexa fuera l’usu de la llingua asturiana, lo que ta xenerando crítiques en redes sociales.

N’años anteriores el cartelu nun yera siempre n’asturianu dafechu, pero sí que yera l’idioma mayoritariu nel mesmu, con dalguna parte en castellanu en delles ocasiones. Asina, mentes que nel 2018 namái llevaba en castellanu la fecha, y el restu del cartel usaba la llingua asturiana, en 2017 el cartelu yera dafechu n'asturianu.

L’anunciáu güei, mentes, ye en castellanu dafechu y usa namái’l nome de llugar castellanizáu. Sí apaez el nome de Xixón na parte inferior, nun tamañau pequeñu, como parte del logu de Divertia.

En redes sociales nun tardaron n'apaecer reaiciones criticando esti retrocesu nel usu del idioma, más cuando se trata d'un certame venceyáu a una manifestación cultural del país na que l'asturianu ye la llingua d'usu habitual dende hai décades.

El día grande, el domingu 25

La programación de la XXVIII Fiesta de la Sidra Natural ta zarrándose y contará, de nueves,  col Mercadín de la Sidra y la Mazana; l’intentu del récor mundial d’escanciáu na sablera d’El Natahoyo, pa lo que ye necesario superar los 9.580 del añu pasáu, nel que ye preciso superar la cifra de 9.580 escanciadores; los tradicionales cantares de chigre na Plaza Mayor; el Concursu Oficial d’Escanciadores; y la xornada de prueba, día grande cola que se pon el ramu a la folixa.