Fernández Alonso, representante primeru d'EQUO na llista conxunta con Podemos

La formación ecoloxista va ocupar el puestu 5 de la candidatura liderada por Huergo.

Rufino Fernández Alonso, xixonés de 40 años y miembru d'EQUO dende la so fundación nel 2011, resultó escoyíu na asamblea d'Alternativa Verde por Xixón-EQUO celebrada ayeri como cabezaleru de la formación. Esta formación algamara la selmana pasada un alcuerdu con Podemos pa dir xuntos depués de salise tiempu atrás de la candidatura de xunidá popular Xixón Sí Puede cola que dambos partíos acudieren nes eleiciones del 2015.

El candidatu ecoloxista, que va ocupar el puestu númberu 5 de la llista, ye llicenciáu en Filoloxía Inglesa y trabaya como profesor, siendo conseyeru d'EMTUSA en representación de Xixón Sí Puede na llexislatura actual hasta ochobre, momentu nel que presentó la so dimisión depués de qu'EQUO decidiera retirar el so apoyu políticu a la candidatura de xunidá popular. Anguaño Fernández Alonso participa na Mesa de Coordinación d'Alternativa Verde por Asturies-EQUO como responsable d'Organización Territorial.

Tamién va dir na llista conxunta de Podemos y Alternativa Verde por Xixón-EQUO, que lidera l'asturianista Yolanda González Huergo, Olga Muñiz Rimada, Andrea Berrocal, Francisco Coca y Alberto Cabello en representación de la organización ecoloxista en posiciones entovía por confirmar.