El 8-M tiñe otra vuelta Xixón de malva

L'asistencia na concentración de la Plaza Mayor del meudía, asina como n'otres del país, amenazaba esti 8-M, Día Internacional de la Muyer, con una manifestación entá más numberosa que la del añu pasáu. Les cifres, sicasí, foron mui superiores, axuntando'l vienres en Xixón a más de 100.000 persones, según la organización.

Los dos quilómetros de vía que separtan la plaza toros y L'Humedal taben ocupaes por una marea malva nesta xornada de fuelga feminista. Mientres los concentraos na cai Palacio Valdés, la de L’Acerona, sentíen la llectura del manifiestu ellaboráu pola Comisión 8M Asturies, disfrutaben de les actuaciones del Coru Antifascista Al Altu la Lleva y de les pandereteres de Nun Tamos Toes y glayaben conseñes feministes, entovía había xente saliendo d'El Bibio.

Una respuesta espectacular de la sociedá asturiana en reivindicación de la igualdá de xéneru. “Esti ye’l nuesu sieglu y nada nin naide va podenos parar”, declaró Sara Combarros, una de les voceres de la Comisión 8M Asturies pa zarrar una xornada histórica pal feminismu.

“El 8-M sigue güei”

El sábadu, un día depués de la esitosa convocatoria, la Comisión 8M Asturies asoleyó un comunicáu nel qu’afirma que “el 8-M sigue güei. Les nueses reivindicaciones han de ser escuchaes y los nuesos pidimientos han de convertise en lleis. Porque vinimos pa quedanos y amosámoslo con otra xornada histórica que-y dixo a la derecha y al fascismu que deben tener nidio que nos tendrán enfrente defendiendo los nuesos derechos. Por mucho que lo intenten, el feminismu sigue siendo combativu, anticapitalista y en defensa de les muyeres más precarizaes; porque somos un movimientu tresformador de la sociedá y non un productu que vender. Somos imparables”.

La organización destacó “el paru masivu nel ámbitu educativu y tamién un paru del 51 por cientu na Xusticia asturiana, que ye un datu hisóricu”, recordó la presencia na manifestación de munches neñes y neños, asina como de muyeres rurales “qu’acudieron organizes per primer vegada”, y fixo mención de les munches persones que nun pudieron asistir, esto ye, “trabayadores internes en cases, trabayadores n’emplegos precarios y amenazaes de despidu”.