Xunión total pol cumplimientu del conveniu del Plan de Víes

Xixón ta xunida pol cumplimientu del conveniu del Plan de Víes. Vecinos, partíos, sindicatos y la patronal esixen al Ministeriu de Fomentu un compromisu per escrirtu depués de los balones fuera llanzaos pol so titular nuevu, José Luis Ábalos.

La indignación ye total y quedar de brazos cruciaos nun ye una opción. Xixón glaya contra la situación na que ta’l Plan de Víes y anuncia movilizaciones nestos dos meses próximos que se van llevar a tolos barrios baxo’l lema ‘Pa nun perder el tren, Plan de Víes yá', más allá de los movimientos a nivel institucional.

Esta xunión quedó simbolizada la selmana pasada con un actu celebráu nel Antiguu Institutu cola presencia de representantes de tola sociedá civil xixonesa. Tita Caravera, ex presidenta de la Federación d’Asociación de Vecinos (FAV), encargóse de la llectura d’un manifiestu de protesta que xenera un consensu poques veces vistu.

La razón ye la inconcreición d’Ábalos con respeuto al proyeutu depués del cambiu de Gobiernu en Madrid tres la moción de censura a Mariano Rajoy. El Partido Popular (PP) prometiera avances con feches concretes, qu’agora queden nel aire pola posición del titular nuevu de Fomentu, que condiciona la firma del conveniu al estudiu informativu en marcha sobre la estación intermodal, lo qu'allarga entovía más los plazos.