'Xixón de novela': percorríu lliterariu pela ciudá n'asturianu

La Oficina de Normalización Llingüística entama esti branu percorríos pela ciudá pa dar a conocer la so cara lliteraria. La zona centru y Cimavilla concentren los puntos que 'Xixón de novela' va dar a conocer en compañía de testos de dellos autores.

Esti llibru, adaptáu yá a aplicación por dispostivos móviles, ye la base d'estes rutes de baldre de 60 minutos de llargor que comiencen a les 11 hores en La Escalerona. En concreto, son dos percorríos, siendo la Estatua Pelayo, la Plaza'l Parchís o la Ciudadela de Celestino Solar paraes de la de la zona centru de la mano d'autores como Berto Cobreros Gil, Vicente García Oliva, Milio Rodríguez Cueto, Roxelio Crespo González o Carme Martínez Pérez.

Pela so parte, el de Cimavilla va pasar per La Cuesta'l Cholo, el Palaciu de Revillagigedo o'l 'Elogio del Horizonte', col acompañamientu de testos de Xulio Berros, Roxelio Crespo, Sabel de Fausta, Ramón Ll. Bande, Pablo A. Marín y Xandru Martino. Les salíes próximes pa esta ruta van entamase'l xueves y los díes 9 y 30, mentes que pa la de la zona centru tán afitaes pa mañana y los díes 8 y 29.

Les víes p'apuntase pa 'Xixón de novela' son los númberos de teléfonu de la Oficina de Normalización Llingüística (985.18.14.28 o 985.18.13.89) o nes oficines de turismu asitiaes enfrente La Escalerona y nel espigón central de Fomento.