Los pacientes d'ictus en Cabueñes van disponer d'una guía d'ayuda

Tamién ta orientada a familiares y cuidadores.

L'Hospital Universitariu de Cabueñes ta acabante d’espublizar la guía ‘Cuidados del paciente tras el Ictus’. Trátase d’un documentu d'ayuda y orientación en tol procesu con conseyos y información útil para facilitar la reincorporación a la vida activa del que sufriere l’accidente cardiovascular.

La guía ellaboróla un equipu multidisciplinar integráu por personal médicu y d'enfermería de la Xunidá d'Ictus y complementa’l Programa d'Educación Sanitaria nel Ictus, qu'apurre conocencies y habilidaes pa caltener la salú y prevenir la recayida d'esti tipu de pacientes. Esta xunidá púnxose en marcha nel 2008 y de media cada añu atiende a más de 500 pacientes, coincidiendo la mayor parte d’ellos en contar con numberosos duldes sobre l’ictus tanto nel momentu de  la so hospitalización como na del alta.

El documentu pretende ser una ayuda y dar respuesta a les entrugues más frecuentes sobre los accidentes cardiovasculares, dando amás información afayadiza y preseos pa facilitar la vuelta a casa de los pacientes, fomentar la so participación nel autocuidáu y acelerar el procesu a algamar el mayor grau d'autonomía posible. N’Asturies los ictus motiven 900 muertes añales, siendo la principal causa de mortalidá de la población, la mayor ente les muyeres y la tercera mayor ente los homes.