Esposición y cuentacuentos del llibru “Falar ensin parar”

Del 27 d’abril al 20 de mayu la Sala 3 del CCAI va acoyer un espo-cuentu de la obra “Falar ensin parar”  con testos de Carlos Espina y dibuxos de Marina Lobo. Esta esposición va complementase con dos actividaes de cuentacuentos.

Ente ser un poco charrana o quedase cola palabra na boca, la protagonista d’esti cuentu tienlo mui claro. A otros da-yos por axuntar caxigalines inútiles, pero ella quier más axuntar pallabres. Perguapa historia empobinada a rapacines y rapacinos de 4 a 9 años y asoleyada pola editorial Impronta.

Pallabres grandes, pallabres pequeñes, pallabres redondes y cuadraes, pallabres puntiagudes y blandines… como actividá complementaria, el miércoles 2 de mayu y el miércoles 9 de mayu, a les 18.00 h, na mesma Sala 3 del Antiguu Institutu, va haber una sesión de cuentacuentos con Olga Cuervo. La entrada ye de baldre hasta completar aforu.