Los sindicatos de clase manifiéstense en Xixón pol Primeru Mayu

El Muséu del Pueblu d'Asturies va acoyer dende les 14.30 hores una folixa solidaria.

A les 12.30 hores van salir a la cai la Corriente Sindical d’Izquierda (CSI), el Sindicatu Unitariu Autónomu de los Trabayadores de la Enseñanza d’Asturies (SUATEA), la Confederación General del Trabajo (CGT) y la Confederación Nacional del Trabajo (CNT), cola novedá de que la salida va facese dende la Sindical. D’esta manera estes organizaciones pretender protestar esti Primeru de Mayu, Día Internacional de los Trabayadores, “escontra l'intentu de valtar l'edificiu, al empar que reivindicar la hestoria del movimientu obreru asturianu, la nuesa hestoria”.

El lema de la marcha d’esti añu ye ‘Escontra la precariedá ¡¡rebélate!!’, poniendo’l focu nel retrocesu “de manera alarmante nes condiciones llaborales y de vida de tola clase trabayadora” y destacando les movilizaciones feministes y poles pensiones. “Esti Primeru Mayu llamamos a tola clase trabayadora a que se rebele escontra la precariedá, escontra la esplotación y escontra un sistema fechu a la midía del empresariáu y pal que la clase trabayadora nun merecemos siquier la condición de seres humanos”, afalen los sindicatos convocantes.

Nesta movilización va repetise la convocatoria d'un bloque soberanista coordináu por #LluchandoPolaSoberanía. "P’acabar coles problemátiques que carecemos como clas trabayadora, precisamos de l’autoorganización, de la llucha, de tresformar la realidá del nuesu país. Nós tenémoslo claro: frayar la precariedá y abrir un camín nuevu pa la nuestra clase y pal nuestru pueblu", espresen.

Xuegos tradicionales y conciertos

El Muséu del Pueblu d’Asturies va ser sede, un añu más, d’una folixa solidaria convocada por Para@s y Precari@s d’Asturies col sofitu de la CSI. Ésta va comenzar depués de la manifestación que’l sindicatu convoca en Xixón, con una xinta nel prau onde’l tendayu y apertura prevista del chigre pa les 14.30 hores.

A les 17 hores va haber xuegos tradicionales, a cargu de la Tertulia Cultural El Garrapiellu, un taller de pintura y pintacares con Asturies de Fieltru, y un conciertu coles actuaciones de Silvidos y Gemidos, y Extracto de Pollo en Lata.