L'Antroxu yá tien cartelu
|
18 Xineru, 2018 por Redacción
'Dándole vueltas al disfraz', de Cristóbal Aguiló Domínguez, esbilláu como cartelu de la edición viniente del antroxu xixonés.
El concursu entamáu por Divertia pa escoyer un cartelu col qu’ilustrar l’Antroxu, que se celebra del 9 al 13 de febreru, ya tien ganador. L’afortunáu ye l’ilustrador Cristóbal Aguiló Domínguez, de 49 años y residente en Cartaxena (Murcia).
La ilustración que compón el cartelu foi creada y modelada en plastilina y darréu fotografiada. Depués d’ello, desendolcóse l’arte final del cartelu xunto colos tipos n’ordenador.
Cristobal Aguiló lleva más de 20 años trabayando nel seutor de la comunicación, en llabores de creativu, diseñador gráficu, direutor d’arte ya ilustrador. Tien ganao más de cien concursos de cartelos, ente los que destaquen los de les fiestes de San Timoteo de L.luarca 2015, Soria, Burgos, Cuenca o los antroxos de Las Palmas de Gran Canaria (2017), Maspalomas (2015), Miguelturra (2017), Huelva (2013) o Isla Cristina (2016).
Al concursu presentáronse 21 pieces, que destacaron pola so gran calidá. La esbilla realizóse a sobre zarráu. El sobre colos datos del ganador abrióse tres seleicionar el proyeuto más prestosu un xuráu compuestu por 5 persones.
