La sidra protagoniza la charra mensual d'Ástura

Marcos Abel Fernández va poner la conferencia 'La sidre y toles cuestiones pendientes', tres la que va guiar una tastia de sidres internacionales y la so comparanza.

"¿Ye lo mesmo sidre asturiano que sidre d’Asturies? ¿La sidre que se fai n’Asturies ye sidre asturiano o namás aquello que ta fecho con mazana asturiano? Y si ye asina, ¿val con cualaquier mazana o namás con aquelles reconocíes pol Conseyu Regulaor de la Denominación d’Orixe Protexío 'Sidre d’Asturies»? ¿La sidre casero ye sidre asturiano? ¿Y la sidre axampanao?" son dalgunes de les cuestiones que va responder el direutor de la revista La Sidra y presidente de la Fundación Asturies XXI, qu'entama tolos años actividaes sidreres como'l Primer Sidre l'Añu o'l Salón Internacional de les Sidres de Gala, na cita de l'Asociación Cultural Ástura'l tercer martes de cada mes cola cultura asturiana nel Atenéu Obreru de Xixón. "Ye preciso que la sociedá asturiano tea nidios los conceutos, porque corremos el peligru de perder un padremuñu material inmensu si nun somos a afitar esos términos correchamente, o lo que ye pior, permitimos qu’otros los remanen en beneficiu propiu", apunten dende esti coleutivu.

La charra de mañana, con comienzu previstu pa les 19.30 hores y con entrada llibre, va completase con una pequeña introducción a otres sidres de fuera d'Asturies, en función del métodu d’ellaboración y l’aniciu xeográficu de les mesmes, "continuación obligada d’esa mesma reflexón, como tendrá oportunidá de vese nel trescursu de la conferencia". Pa finar va entamase una tastia y comparanza d'una esbilla de les mesmes.