La conseyera d’Infraestructures insta al Gobiernu de Rajoy a impulsar el plan de víes de Xixón “con fondos y voluntá política”

Belén Fernández recuerda que’l proyectu tuvo paráu más de cuatro años y denuncia que los Presupuestos Xenerales del Estáu condenenlu al olvidu. Asegura que’l Principáu “enxamás bloqueó l’avance d’esta actuación”, que figura como prioritaria nel documentu Alianza poles infraestructures del Estáuo qu’Asturies necesita.

La conseyera d'Infraestructures, Ordenación del Territoriu y Mediu Ambiente, Belén Fernández, encamentó güei al Gobiernu de Mariano Rajoy a impulsar el plan de víes de Xixón “con fondos y voluntá política”. “Ye la falta de compromisu del Executivu central la que caltién esti proyectu en puntu muertu y eso sábelo tola sociedá asturiana”, señaló.

Fernández reclamó al Partíu Popular que “dexe d'inventar esculpes sobre'l plan” y que nun intente achacar al Principáu “la responsabilidá de la so propia inacción”. Nesti sentíu, recordó que l'actuación tuvo parada más de cuatro años cuando Ana Pastor yera ministra de Fomentu y alvirtió de qu'agora, col actual titular, Iñigo de la Serna, “lleva'l mesmu camín”.

“Dende'l Gobiernu d'Asturies siempre fuimos claros col proyectu y, anque'l nuesu criteriu alredor del allugamientu de la estación intermodal ye conocíu y xustificáu, enxamás bloquiemos la meyora del plan”, precisó la titular d'Infraestructures.

Según señaló, esi interés na meyora de la obra queda claramente reflexáu nel documentu Alianza poles infraestructures del Estáu qu'Asturies precisa, suscritu'l pasáu 23 de marzu con organizaciones empresariales, sindicales, sociales, la Federación Socialista Asturiana ya Izquierda Xunida. El testu apuesta por impulsar el plan de víes de Xixón y, prioritariamente, la estación intermodal de viaxeros, “siguida de la penetración ferroviaria pa la llegada del tren hasta posiciones de clara centralidad na ciudá”.

“Tanto Rajoy como'l ministru de Fomentu tienen yá sobre la so mesa esi documentu, nel que s'inclúi'l plan de víes como proyectu prioritariu y urxente”, sorrayó Belén Fernández.

Al so xuiciu, el PP “busca desesperadamente crear cortines de fumu con argumentos de poco fuste”, nesti casu, “p'azorronar el notable olvidu al plan de víes nel proyectu de Presupuestos Xenerales del Estáu p'anguaño”.