Soliciten una placa que recuerde a Pi i Margall na cai Los Moros, la que llevó’l so nome

L'historiador Javier Cubero presentó esti martes un escritu al Conceyu de Xixón, col aval de la Sociedá Cultural Xixonesa y l’Atenéu Obreru de Xixón, pa solicitar una placa que recuerde a Francesc Pi i Margall na cai Los Moros. Ésta llevó’l so nome ente’l 1911 y el 1937.

El Conceyu de Xixón, a pidimientu del Partido Republicano Federal, decidió rebautizar la cai Los Moros como cai de Pi y Margall –el so apellíu en castellanu–, una denominación que duró 25 años, hasta la entrada de les tropes ‘nacionales’ na ciudá. “Nun pidimos el cambiu de nome, por tol procesu que conllevaría, pero sí la instalación d’un placa memorística agora que se cumple, el 29 de payares, el 115 aniversariu de la so muerte”, esplica Cubero.

Ente los argumentos espuestos nel escritu destaquen la so significación histórica, l'aportación de los sos discípulos na sociedá asturiana y xixonesa, y el propiu pasáu d'esa vía pública. En concreto, el testu propuestu al Conceyu de Xixón y a tolos grupos municipales ye’l siguiente: “Esta vía denomóse «Cai de Francisco Pi y Margall» ente los años 1911 y 1937, n'homenaxe a quien fuera Presidente de la Primer República en 1873. La so mayor obra foi'l Partíu Republicanu Democráticu Federal, que tenía'l llar de la so agrupación llocal nesta cai”.

Pi i Margall foi una de les primeres persones en proponer l’usu oficial del asturianu por parte l’Alministración. Fíxolo nun artículu espublizáu nun selmanariu de Madrid na década última del sieglu XIX en defensa de la llingua catalana na que tamién nomaba al asturianu y a otros idiomes peninsulares, nuna época na que dalgunes constituciones yá empezaben a introducir la catalogación de llingua oficial.