L'Eibar, rival del Sporting na Copa del Rei

El partíu d'ida va ser n'El Molinón.

El Sporting va enfrentase a un rival de Primera nos dieciseisavos de Copa tres el sortéu celebráu esta mañana na sede de la Real Federación Española de Fútbol. Los roxiblancos, que podíen enfrentase a los equipos sobrevivientes de Segunda o a otros conxuntos de la so categoría que nun disputen competiciones europees, según el formatu actual de la competición, van vese les cares col Eibar.

El conxuntu gipuzkoanu ye ún de los más competitivos de la categoría de la mano de Mendilibar, polo que nun será rival fácil pa los d'Abelardo. Dambos equipos nun s'enfrentaron entovía en Lliga, pero sí disputaron un amistosu en Cantabria nel parón de seleiciones de primeros de setiembre, nel que los dos téunicos dieron minutos a los menos habituales, que finó con empate a un gol, tantos marcaos por Borja Viguera y Adrián. En Copa ye previsible que dambos equipos roten tamién a la mayoría de los titulares.

L'últimu precedente en Copa finó col pase del club armeru. Foi na primer ronda de la temporada 2003-2004, con dambos conxuntos en Segunda, partíu únicu que terminó con derrota roxiblanca por 0-1 con un tantu de Cuevas nel minutu 84.

Otra manera, la ida va disputase n'El Molinón la selmana del 30 de payares, mentes que'l partíu n'Ipurua ta programáu pa la selmana del 21 d'avientu. El restu de cruces de los diecisavos de final de la Copa foron los siguientes: Toledo-Villarreal, Formentera-Sevilla, Hércules-Barcelona, Guijuelo-Atlético, Real Racing Club-Athletic Club, UCAM-Celta, Córdoba-Málaga CF, Valladolid-Real Sociedad, Huesca-Las Palmas, Nàstic-Alavés, Alcorcón-Espanyol, Granada-Osasuna, Leganés-Valencia y Betis-Deportivo. El Cultural-Real Madrid, mentes, va celebrase'l día 26 y el 30 de payares, nel casu de la vuelta, pola disputa del club blancu del Mundial de Clubes.