'The Asturian Sisters', de Factoría Norte

La llegada de la pandemia supunxo, ente otres coses, la suspensión d'actividá nos teatros. Trés actrices esitosas del musical, escarmentaes de la precariedá, la inestabilidá y el 'stress' inherentes a la so vida d'artistes, deciden, énte la situación nueva, alloñase de manera voluntaria de la escena per una temporada llarga y formar una comunidá retirada del mundanal ruíu y basada nel esfrute del instante pasaxeru, les bones vibraciones y la paz del espíritu, resumíes nos sos dos principios fundacionales: Kairós y Ataraxia.

Too va bien na comunidá de The Asturian Sisters cuando, de sópitu, el so Responsable Internu d'Actividaes, un tal Leo, da na demencia de creese Leopoldo Alas Clarín, y debilítase día tres día creyéndose inxustamente escaecíu pola sociedá. Agradecíes polos servicios prestaos pol so R.I.A. (como Ribeseya lo taría pola de so), les actrices deciden entama-y un homenaxe que-y devuelva al so ser (o non ser) y a la confianza nel xéneru humanu. Pero los homenaxes cárgalos el diañu. Pasen y vean.

Una comedia ácida, inxeniosa, intelixente, prestosísima, onde los sos protagonistes, transitando pel musical, el cabaré y el vaudeville, vivirán un xuegu d'engaños y desengaños nun mundu enllenu de falses verdaees y verdaderes mentires.

Autor y direutor: Eladio de Pablo.

Intérpretes: Sheila Montes, Ana Morán, Paula Mata, Chus Serrano y Hugo Manso.
Hora: 20.30h