Siguiendo la vía

La esposición 'Siguiendo la vía' propón un viaxe temporal y espacial al traviés del paisaxe qu'atravesaba'l Ferrocarril Vasco Asturiano. Dende'l ventanu del popular Vasco percuérrese Asturies dende Coḷḷanzo a San Esteban, pasando pel so ramal d'Uviéu, bórdiense les vegues de los ríos Ayer, Caudal y Nalón, y revélasenos un territoriu nel que l'agricultura amiéstase cola actividá industrial, apreciándose amás l'entamu del aprovechamientu urbanísticu intensivu.

L'asitamientu de les semeyes na sala reproduz el trazu de la llinia ferroviaria y propón al públicu una mirada nueva, un cambiu de perspeutiva qu'apella a la evocación y la señardá. Cada fotografía amuésanos de forma oxetiva los componentes del paisaxe, les sos cualidaes y les sos interrellaciones.

Les imáxenes exhibíes, cedíes por Adif, atopárose de manera fortuita nel interior del armariu planeru que tamién se muestra na sala. Construyío ex profeso pa guardales, alquier la categoría de cofre del tesoru. Asina, dende'l convencimientu de que'l patrimoniu ha de ponese al serviciu de la sociedá, preséntase esta esposición como'l meyor mou de recuperar y tesmitir el testimoniu qu'ufren estes fotografíes esceicionales.

Na sala espónense setenta fotogramas orixinales a los que s'acompañen semeyes del Centru Documental del Muséu que s'interrellacionen pa favorecer la comprensión d'aquello que se muestra: la esplotación industrial d'una Asturies que taba ente la industria y la agricultura, llegando a percibise elementos agrarios anguaño desaniciaos del paisaxe asturianu como les cuques de maíz. Esti percorríu a lo llargo de la vía del Vasco descúbrenos elementos fundamentales d'un pasáu non tan llonxano que modeló'l nuesu presente.
Hora: Cerrado los lunes