'Qualcosa nascerà da noi', de Pablo Fidalgo

Pocu tiempu depués d'aportar a Roma, daquién que conocía'l mio trabayu col documental y cola mio historia familiar, punxo nes mios manes una correspondencia. Yeren cintes de cassette grabaes pol so tíu Alessandro, nes que-y falaba a una muyer, a América, a lo llargo de 30 años. Neses cintes contábase lo que paecía una intensa y estraña historia d'amor. Yeren munches horas de material, y yo debería decidir si teníen valor dalgún y si quería facer dalgo con ello.

Esta persona, de la que malpenes tenemos datos, y que sigue viviendo, a los sos 85 años, nun pueblo de los Apeninos, yera un completu misteriu pa nós, y nunca pudimos llegar a conocelu. Apasionáu pola lliteratura mística, neses cartes falaba de dellos escritores que yo lleera, tornara y estudiara per años: Cristina Campo y Mario Luzi. Per cuasi seis meses tuve sintiendo, trescribiendo y esbillando los cachos de cartes. Juan Loriente falárame siempre del significáu de grabar, amosárame les sos miles de cintes de cassette u grabara, pue dicise, tola so formación y tola so vida. Yera necesario qu'él fora l'intermediariu, el que compartiese y punxere voz a esa historia.

Asina, too desendólcase como una aición cenciella. Esta ye una pieza sobre una correspondencia amorosa, pero tamién un percorríu pela historia italiana, peles vides callaes y abellugaes, y sicasí, de dalguna manera, plenes. Tratamos d'imaxinar la vida y la soledá d'Alessandro y el so trabayu minuciosu de documentación, con fidelidá y con llibertá, intentando saber d'ú sacó esi aliendu pa dicir y dicir, a lo llargo de tantos años, quién yera; pa rexistrar cómo se trensformen les persones y los sos deseos, pa insistir nuna aición que munchos podríen calificar d'absurda.

Salimos del teatru pa ocupar un espaciu intermediu, una sala abierta sobre un xardín. Tenemos solo la metá de les cartes y poro namái la metá d'una historia. Les aiciones y el dicir reconstrúin y convocen a los ausentes, a veces en forma de cantos de páxaros, a veces en forma de fueyes movíes nel vientu. En tou casu, siempre, siempre, hai una respuesta.

Con Juan Loriente.

Producción y asistencia de direición: Amalia Area.

Videu y rexistru fotográficu: Vicente Vázquez.

Collaboración artística: Anna Talens.

Torna: Elisa Tramontin.

Fotografía: Luis Nocete.
Hora: 19.30h