¿Ye necesariu un Muséu de Xixón na ciudá?

Ástura entama un alderique sobre la posibilidá de que l'edificiu de Tabacalera sía sede d'esta instalación museística.

El mes pasáu, coincidiendo col Día Internacional de los Museos, los direutores de los museos municipales fixeron frente común pa nun arrenunciar a crear un Muséu de Xixón en Cimavilla. Ástura considera interesante esti alderique abiertu, polo qu'organiza una mesa redonda baxo'l nome '¿Por qué necesitamos un Muséu de Xixón?'.

L'actividá, cabera d'esta temporada de charres sobre cultura asturiana, va tener llugar mañana a les 19.30 hores nel Atenéu Obreru de Xixón (Cuadonga, 7), con entrada llibre. Nella va participar Lucia Peláez, direutora de los museos de Belles Artes del Conceyu de Xixón (Muséu Nicanor Piñole y Casa Natal de Xovellanos); Ramón Alvargonzález, caderalgu d'Análisis Xeográficu de la Universidá d'Uviéu y direutor de la Fundación Alvargonzález; y l'economista José Manuel Balbuena.

Na semeya, fotograma del videu promocional del Conceyu de Xixón.