Xixón yá ta na fase 2

Asturies ye ún de los territorios qu’esti llunes pasó a la fase 2 de la desescalada, polo que los xixoneses tán viviendo una xornada con menos restricciones, yá ensin franxes horaries salvo la de los grupos de riesgu. Munchos hosteleros abrieron al poder usar l’interior de los llocales, pero’l Xovellanos y los cines retrasen la so actividá.

La principal novedá de la entrada a la fase 2 ye que se pue pasiar y prauticar deporte, inclusive pasando a otros conceyos, a cualquier hora, a esceición de 10 a 12 y de 19 a 20 hores, momentos que siguen acutaos pa los mayores de 70 años. Tamién se quiten les restricciones de númberu, polo que les families tienen la opción de salir al completu.

No que respeuta a les reuniones de grupu la llende pasa de 10 a 15 persones, siempre calteniendo la distancia de seguridá. Amás de les terraces va ser posible ocupar tamién los interiores de los llocales d’hostelería, con un máximu d’aforu del 40 por cientu, lo qu’animó a munchos chigres que siguíen pesllaos a abrir les sos puertes a los veceros.

Lo qu’entovía nun podrán disfrutar los xixoneses son los baños na playa, yá que l’alcaldesa quier garantizar la seguridá. Tampoco’l Xovellanos pol mesmu motivu y los cines, nel so casu pola falta de rentabilidá al tener que reducir l’aforu al 30 por cientu.

Al respeuto, l'Autocine anuncia que va reabrir el vienres 5 de xunu cola proyeición de 'Mad Max: furia en la carretera'.

Na imaxe, veceros nuna terraza de la plaza'l Llavaderu (Arturo Arias) esta mañana. Semeya obra d'Álvaro Suárez.