Xixón Sí Puede convoca un conceyu pa valorar facer una consulta sobre les corríes de toros

El conceyu va ser el próximu 31 de mayu a les 19 hores nel CMI d'El Llano.

Xixón Sí Puede (XsP) yá llevó al Plenu del Conceyu de setiembre de 2015 una propuesta que nun salió alantre, na que demandaben que nengún espaciu municipal pudiera ser utilizáu pa que'l maltratu animal sirviera d'espectáculu de diversión. 

“Naquel momentu yá se punxo sobre la mesa la posibilidá de faer una consulta ciudadana sobro esta tema per parte de XsP y la mesma alcaldesa nuna entrevista a la prensa amosábase favorable a convocar una consulta ciudadana sobre esti asuntu”, recuerda Nuria Rodríguez López, conceyala de XsP y responsable d'Igualdá, Facienda y Empléu de XsP.

Por tou esto, XsP convoca pal próximu 31 de mayu nel Centru Municipal Integráu d'El Llanu a les 19:00 hores un alcuentru abiertu pa valorar la conveniencia o non de realizar una consulta popular sobro les corríes de toros en Xixón. “Queremos testar el sentir mayoritario de les persones nel conceyu”, esplica la conceyala de XsP.

La intención sería falar nesa asamblea de si se considera conveniente o non realizar esa consulta popular y, en casu afirmativu, definir cómo y quién la llevaría adelantre. “Dende'l Círculu Animalista de Podemos constatamos que l'alderique sobre la consulta popular ta enriba de la mesa y queremos dar esti primer pasu con un alcuentru nel que se fale abiertamente de cuálos son los pasos oportunos a tomar”, resume la conceyala de XsP.

Semeya: Plaza d'El Bibio de Asturkian - Trabayu propiu, CC BY-SA 3.0, Enlace