Xixón en prealerta por contaminación atmosférico

|
Xixón en prealerta por contaminación atmosférico

El Gobiernu d’Asturies declaró’l nivel de prealerta por contaminación atmosférico na zona de Xixón, porque nos postreros trés díes superóse’l tope de partícules de diámetru inferior a 10 micres (PM10) y la situación complicóse de resultes de les quemes qu’afecten al país. La estabilidá atmosférica y les inversiones térmiques tan fuertes provocaron un empeoramientu de la calidá del aire nesta zona y tamién n’Avilés, onde s’activó’l nivel d’avisu.

Les condiciones ambientales mentaes xuben los niveles de partícules en suspensión y estorben que los contaminantes s’espardan. A esto súmense, en dellos casos, los vientos del sur o suroeste, que puedan tresportar partícules de polvu del norte d’África. La escuridá apreciable güei ye un efectu deriváu de la fumareda provocada poles quemes y confíase en que vaiga menguando y espardiendo a lo llargo de la xornada.

La declaración de prealerta implica l’adopción de midíes preventives y correctores na zona de Xixón ente les que s’incluyen la información a la población, la intensificación de riegos, la prohibición de tráficu pesao nes zones de mayor densidá de población de siete a nueve de la mañana y una vixilancia especial sobre les actividaes industriales qu’impliquen el manexu de material pulverulento.

De toles maneres, el Gobiernu d’Asturies quier treslladar un mensaxe de tranquilidá a la población y aconseya que se faiga vida normal, sacante los grupos de riesgu. La Dirección Xeneral de Salú Pública precisa que nun ye menester recortar les actividaes habituales y que namás tienen que tomar precauciones especiales los grupos de riesgu. Nesti sentíu, la Conseyería de Sanidá aconseya que les persones mayores, los neños, les embaranzaes y los enfermos crónicos –n’especial, aquellos afectaos por problemes respiratorios, cardiovasculares y inmunosupresión- reduzan l’actividá física intensa nel esterior.

Quemes actives

Actualmente hai 35 focos activos y trés conatos contra los que lluchen 400 efectivos en tierra, amás de les fuercies y cuerpos de seguranza y la Unidá Militar d’Emerxencies. Educación suspendió les clases en 23 centros de Cangas del Narcea, Degaña, Ibias, Ayande y Tinéu que sumen unos 2. 500 alumnos. 

Les quemes atopense en 19 conceyos: Ayande (3), Ayer (1), Balmonte (2), Cabrales (1), Cangas (8), Castropol (2), Cuaña (1), Degaña (1), Grau (1), Ibias (1), Llangréu (1), L.lena (2), Piloña (2), Pravia (1), Quirós (1), Siero (1), Somiedu (1), Teberga (2) y Tinéu (3).

Na semeya: Cielu de Xixón esta mañana.

 

 

Contador Estadistiques