Xixón celebra’l Día de les Lletres Asturianes na rede

La Oficina de Normalización Llingüística, a comuña cola Rede Municipal de Biblioteques, nun quixo dexar de celebrar el Día de les Lletres Asturianes magar que los actos oficiales tuvieron que treslladase al 2 d’ochobre por cuenta la pandemia de COVID-19. Un xuegu, guíes de llectura, la iniciativa 'Xixón de Novela' y un alcuentru con autores son les propuestes.

Les posibilidaes qu’ufierta Internet permite qu’esta fecha nun pase de llargu. Asina’l Conceyu, al traviés del SNL, entama delles actividaes a lo llargo del día.

Dende la mañana yá ye posible guíes de llectures de llibros tanto pa la reciella como p’adultos, asina como un xuegu nel qu’acertar los títulos de les obres premiaes dende l'añu 2017 nos Premios Lliterarios que convoca tolos años la Conseyería de Cultura. Al traviés de l’aplicación ‘Xixón de Novela’ tamién ye posible conocer les noveles que falen de Xixón y facer un percorríu lliterariu y virtual pela nuestra ciudá.

Por último, a les 19 hores, va celebrase un alcuentru con Marta Mori y Migue Rojo, conducíu pol direutor de la Fundación Municipal de Cultura, Educación y Universidá Popular, Miguel Barrero, na cuenta d’Instagram de Biblioteques de Xixón.