Xixón amazcara n'Antroxu

Dende'l xueves, Comadres, hasta'l martes, cuando s'entierra a la Sardina 'Cuca' n'El Muelle, Xixón va vivir cinco díes de folixa, mazcaritos y muncha gastronomía. Celébrase l'Antroxu modernu, qu'anguaño se resume nos xornaes previes al Miércoles de Ceniza, comienzu de la Cuaresma.

El Xueves de Comadres comienza l'Antroxu asturianu modernu, anque l'orixe d'esta fiesta pue tar fuera del Antroxu tradicional. Trátase d'una xornada con munchu raigañu en Xixón na que les muyeres axunten pa comer y pasar una xornada festiva.

Les cigarreres de la fábrica de tabacos de Cimavilla ayudaron a caltener esta folixa na que les muyeres del conceyu acudíen coles sos collacies y les sos fíes hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, teresites, frixuelos o casadielles. Anguaño, la celebración pasa de la tarde a la nueche, con menús especiales nos chigres.

Ye de destacar tamién el llabor de la Tertulia Feminista Les Comadres pa potenciar esta fecha festiva, dando-y un toque reivindicativu. Esti grupu de muyeres entama tolos años una cena, nesta ocasión na sala Acapulco con actuación d'Assia, na qu’entreguen dos premios: el ‘Comadre de Oro’ y el Felpeyu, ésti últimu a persones o entidaes que desprecien a la muyer.

La premiada esta edición ye l’activista Amelia Tiganus, “pol so llabor intensu de denuncia, sensibilización y prevención de la trata y la prostitución, poniendo conferencies, charres, talleres, seminarios, etc.”, mentes que l'antipremiu ye pal presidente del Partido Popular (PP), Pablo Casado, “por insistir n’intentar imponer una involución brutal na llexislación qu’afeuta de manera direuta a les muyeres, esto ye, a los derechos humanos; utilizándonos amás como moneda de cambiu nes negociaciones polítiques”, al qu'hai que sumar esti añu'l de Babayu pal presidente del Club Atlético de Madrid, Enrique Cerezo. Otra manera, la escritora Pilar Sánchez Vicente va recibir esta nueche tamién una 'Comadre de Oro Especial'.

El modelu de Rio o Tenerife

L'Antroxu de Xixón cuenta con música y numberoses actividaes hasta'l martes más orientaes a asemeyase a los carnavales de Rio de Janeiro, Tenerife, Las Palmas o Cádiz qu'a otra cosa, lloñe de la tradición. Güei los colexos van recibir a los escolinos amazcaraos y les charangues van calecer mañana motores pal concursu d’estes formaciones del sábadu y del domingu, que yá va pola so trentena segunda edición, con una participación alta nel Teatru Xovellanos.

El Llunes d'Antroxu ye'l día principal col desfile de charangues y carroces con salida a les 19 hores de la plaza de toros y final en L'Humedal, un ambiente festivu con toles persones amazcaritaes que se va allargar hasta bien entrada la madrugada. En Begoña va haber verbena a les 22 hores cola orquesta gallega Los Satélites.

Al día siguiente, Martes d'Antroxu, festividá llocal, ye habitual acudir a los restoranes del conceyu a disfrutar del menú d’Antroxu compuestu por pote y el picadiellu o fartucar en casa de productos procedentes del goche. Tamién de los postres típicos d'estes feches, comos los frixuelos o les picatostes.

A les 20.15 hores va procesede na plaza'l Marqués al entierru de la Sardina, bautizada esti añu como 'Cuca', que será recordada pol so mensaxe contra los plásticos na mar. El cortexu fúnebre va salir del Paséu Begoña a les 19.15 hores.