VI Día de la Reciella: diversión a esgaya nel Muséu del Pueblu d’Asturies

|
VI Día de la Reciella: diversión a esgaya nel Muséu del Pueblu d’Asturies

Conciertos, talleres y xuegos van enllenar de diversión el Muséu del Pueblu d’Asturies con motivu del VI Día de la Reciella. La III Entaína, carrera familiar pol asturianu, va abrir la xornada. 

Dende les 11 hores va comenzar la entrega de dorsales, cola posibilidá d’apuntase p’aquellos que los dexaron pa última hora o nun acaben d’atrevese a participar nuna prueba cargada de simbolismu que va comenzar a les 11.30 hores. Al meudía, tres la entrega del avituallamientu a tolos participantes, van entregase los premios onde la bolera.

Los dos primeros talleres van comenzar a les 12.30 hores: ‘Reciclamos la viesca de los llibros’, cola collaboración d’Emulsa, y ‘Iniciación a la bolera’, destináu a neñes y neños de 7 a 14 años. Skama la Rede va facer baillar a la reciella a les 13 hores con un conciertu con repertoriu especial, pa depués poder disfrutar d’una amuesa de baloncestu col Teslacar Círculo, nel que Samuel Gradín pa poner la voz.

Karaoke de Bestiariu

Tres una posa pa xintar y descansar, a les 16 hores va entamase un karaoke pa cantar los temes de ‘Bestiariu’ y otros cantares favoritos de la reciella y va comenzar el mercadín de lliteratura y música. Guaje Skates va poner una amuesa de monopatín a les 16.30 hores, y CuatroGotes un taller de nome ‘¿Facémonos youtubers?’ a les 17 hores.

Al empar, nel prau central, tolos asistentes van poder disfrutar de xuegos tradicionales de la mano d’Esbilla. El conciertu de Pop Piquiñín (18 hores), compositor del cantar promocional d’esta edición ‘¡Espoxiga!’, y la danza prima posterior van poner el ramu al VI Día de la Reciella, onde tamién va haber una gran xincana col Monino Tamarino a lo llargo del día.

Contador Estadistiques