V Día de la Reciella: 'N'asturianu, sumes'

Esti domingu nel Pueblu d’Asturies va celebrase'l V Día de la Reciella, Onde L’ociu y el deporte, protagonicen una xornada en familia con más d’una docena d’actividaes.

La sala de conferencies del xixonés Centru de Cultura Antigüu Institutu acoyó la presentación ayeri del programa completu d’esta edición del Día de la Reciella, actividá qu’entama ‘Reciella. Families pol Asturianu’. “La intención del Día de la Reciella ye tener una xornada d’ociu familiar y convivencia nel que la llingua asturiana sía vehicular; que nun sía protagonista más allá de ser el vehículu de comunicación”, apuntó’l miembru del coleutivu, que destacó l’aumentu d’actividaes d’ociu y deporte y la intención de “ampliar y ameyorar” lo fecho n’años anteriores.

Asina, la carrera familiar pol asturianu, la II Entaína, va encargase d’abrir les actividaes a les 11.30 hores, anque’l plazu pa la recoyida de dorsales va comenzar 30 minutos enantes, cola posibilidá entovía d’apuntase a última hora pa los qu’entovía nun lo fixeren. “Ye mui fácil”, d’uun formatu de marcha d'un quilómetru, a la que se xunen nesta segunda edición trés categoríes pa neños y neñes de distintes edaes, con un llargor de 150, 250 y 400 metros, polo que nun ye necesario tar avezáu a facer deporte pa participar.

Talleres, un partíu de fútbol y otru de rugby comentaos n’asturianu, un monólogu, xuegos tradicionales y skate, y dos conciertos, ún cola collaboración de Nacho Fonseca –homenaxáu nel Entaína xunto cola so familia– y otru temáticu de ‘Bestiariu’, completen les actividaes que se van desendolcar hasta les 19.30 hores, toes elles de baldre. Los neños y neñes que participen nelles van tener que tar acompañáu d’un adultu en too momentu.

Amás, les persones que s’averen al Muséu del Pueblu d’Asturies van poder participar nuna xinta nel chigre instaláu nel llugar y visitar los puestinos con llibros y discos infantiles, el de la Oficina de Normalización Llingüística y l’espaciu de xuegu llibre qu’entama l’Asociación d’El Rellugu.

Importancia de la tresmisión nel nucleu familiar

Nel actu d’ayeri tamién intervinieron David Varela, autor del cantar ‘N’asturianu, sumes’, con lletra de Guardado, que ye’l lema d’esta edición del Día de la Reciella, y Ana Montserrat López Moro, conceyala d’Educación y Cultura. El músicu destacó que col asturianu “siempre sumes, siempre vamos p’alantre’ y animó a la xente a averase a Muséu del Pueblu d’Asturies.

La edil de Foro, mentes, señaló que “nun podemos nin debemos escaecer que la llingua asturiana ye un patrimoniu inmaterial de tola ciudadanía d’Asturies y que tresmitiéndola y usándola tamos faciendo una importante aportación a la riqueza y diversidá cultural de la humanidá”. “Si la familia usa l’asturianu, amás d’otra llingua, nesti casu l’español, castellanu, los neños y neñes van tener munches más facilidaes pa deprender otres llingües”, añadió.

Programación del V Día de la Reciella

Ésta ye la programación completa del V Día de la Reciella:

• 11 hores: inscripción y recoyida de dorsales de II Entaína (bolera)
• 11.30 hores: salida de la II Entaína (bolera)
• 12 hores: llegada de la Entaína, entrega avituallamientu y de premios (bolera)
• 12.30 hores: talleres ‘La Viesca de los llibros’ (prau fonte) ‘Yoga en familia’ (llagu), entamaos por Reciella.
• 13 hores: partíu de fútbol d’equipos de base del UC Ceares (anfiteatru), colo comentarios de Nacio González  y Miguel Fernandi (llocutores).
• 13.30 hores: conciertu ‘A cantar con Nacho Fonseca’ (tendayu).
• 14 hores: posa y xinta.
• 16 hores: monólogu ‘Colasín’ (tendayu), interpretáu por Martín Peña Alba, y xuegos tradicionales (prau central), entamaos pola Asociación Cultural Esbilla.
• 16.30 hores: exhibición de skateboard (anfiteatru), entamáu por Guaje Skates
• 17 hores: partíu de rugbi (llagu), comentáu por Ramón Matilla, cola collaboración de Gijón Rugby Club-Universidad de Oviedo.
• 17.30 hores: talleres ‘Un güertu urbanu pa neños’ (prau la fonte), entamáu por Ecoasturias, y ‘Somos periodistes (viesca de los llibros), por CuatroGotes
• 18 hores: conciertu ‘Bestiariu’ (tendayu), entamáu por La Fabriquina.
• 19 hores: Danza Prima y pieslle (prau central).

Na semeya, López Moro y los miembros de 'Reciella. Families pol Asturianu' Guardado y Varela.