Una esposición dedicada a Margarita Salas amuesa n’asturianu la so trayeutoria y el papel de les muyeres na ciencia

|
Esposición ‘Margarita Salas, una muyer con ciencia’

‘Margarita Salas: una muyer con ciencia’ ye’l nome de la esposición en llingua asturiana pensada pa escolinos, pero recomendada pa persones de toles edaes. Pue visitase nel Centru de Cultura Antiguu Institutu y nella va conocese la trayeutoria de la valdesana asina como l'importante papel de les muyeres na investigación científica.

L’amuesa articúlase en nueve paneles de conteníu sobre la boquímica asturiana, una de les figures más relevantes del sieglu XX, que se dividen en ‘Biografía’, ‘Investigación’, ‘Reconocimientos’, ‘Muyer y Ciencia’ y ‘Estoyu’. Complétase con un vinilu y trece cuadros pa saber un poco más sobre les muyeres más relevantes na historia de la ciencia y les matemátiques, amás d’una mesa de llaboratoriu, un microcospiu, una cadena d’ADN y un audiovisual cedíu pol Museo de Ciencias de la Universidad de Navarra, nesti casu nel esterior de la sala, que ye un resume en dibuxos animaos de la vida y obra de Salas.

Esta iniciativa naz de Casio pa divulgar la figura de les científiques y trabayar recursos STEAM (Ciencia, Teunoloxía, Inxeniería y Matemátiques) centraos nes muyeres. Los materiales tán disponibles en toles llingües del Estáu, encargándose de la torna al asturianu la Oficina de Normalización Llingüística.

“Con esta esposición queremos dar un pasu más na normalización de la llingua asturiana na ciencia: yá hai tesis científiques, yá hai TermAst de bien de disciplines científiques –l’últimu lleva por títulu ‘Terminoloxía de bioquímica y bioloxía molecular’, mui venceyáu a esto–, y presentamos, tamién, un averamientu didáuticu a la figura de Margarita Salas n’asturianu”, apunten dende’l SNL xixonés, porque “como persabemos, toles llingües valen pa falar de too”, tamién de ciencia. Ente toles neñes y neños asistentes, la empesa xaponesa va sortiar delles calculadores científiques cola imaxe de Margarita Salas.

La valdesana, que nos dexó l’añu pasáu, contribuyó a descubrir cómo funciona la complexa maquinaria al rodiu del ADN. “El futuru de la investigación y el futuru de la ciencia pasen poles muyeres, nun podemos escaecer les sos contribuciones a lo llargo de la historia”, apunta la organización de la muestra, que se pue visitar hasta'l 31 de xineru na sala 3 del Antiguu Institutu.

Semeya propiedá de la Oficina de Normalización Llingüística de Xixón.

Contador Estadistiques