Un trallazu de Nacho Méndez nel entamu dio'l derbi al Sporting

Los de Ramírez aguantaron el 1-0 per 99 minutos de xuegu énte un Uviéu que tuvo'l balón pero que nun dio trabayu a Christian Joel.

Cuasi cinco años depués El Molinón tornó a celebrar la victoria nun derbi. Si en marzu del 2019 foi gracies a un gol d'Álex Alegría, nesta ocasión el gran protagonista foi Nacho Méndez, que nel 1 engachó un balón na frontal pa colocalu na escuadra de Leo Román con un trallazu imparable.

Seríen los primeros minutos roxiblancos énte un Uviéu que poco a poco quixo ganar protagonismu énte un Sporting cómodu defendiendo. De fechu, los visitantes nun xeneraríen peligru a Christian Joel, que namái tuvo qu'esforazase nun tiru de falta de Colombatto.

Na segunda parte l'equipu uvieín pidió dos penaltis. Una falta de Pablo García sobre Moyano señalóla fuera l'árbitru Jon Ander González Esteban, ensin correición dende sala VOR, que tenía al frente al madrilanu David Gálvez Rascón, colexáu que sí llamó al árbitru pa que viera na pantalla del VAR un contautu de Varane sobre Paulino nel minutu 81.

Contra lo habitual, el vascu caltuvo la decisisón al entender, como se pudo comprobar nel audiu fechu públicu pola Real Federación Español de Fútbol (RFEF), que la intensidá nun yera suficiente pa la cayida, esaxerada pol xugador visitante. Nun se movería al final el marcador y los trés puntos quedaron en casa p'allegría de l'afición llocal.

El sábadu, partíu clave col Valladolid

Con esta victoria'l Sporting suma 42 puntos y asítiase en cuartu llugar a 3 de los puestos d'ascensu, que marca l'Eibar, a la espera del resultáu del Valladolid-Albacete d'esta nueche. Nel casu d'empatar o ganar, los pucelanos pasaríen a los xixoneses, que visiten El Molinón el sábadu (18.30 hores; Movistar+ y LaLiga TV HypermotionV).

Na ida, nel primer partíu de la competicióm l'equipu dirixíu por Pezzolano ganó 2-0, polo qu'amás de los 3 puntos en xuegos los roxiblancos, dada la igualdá esistente, han pensar tamién na importancia del 'goalaverage'.