Sidra Camín llevó l’Eloxu d’Oru de la XXXII Fiesta de la Sidra Natural

La XXXII Fiesta de la Sidra Natural echó’l pieslle cola preba de la Plaza Mayor y El Marqués y la entrega de los diferentes reconocimientos. El mayor, l’Eloxu d’Oru, foi pa Sidra Camín, mentes que la Etiquetina más Guapa merecióla Val de Boidesy Antonio Angones, d’El Fugitivo, recoyó’l Tonel d’Oru a toa una trayeutoria.

Atrás quedó una llarga selmana de celebración al rodiu la bébora nacional. El Mercadín de la Sidra y la Mazana animó la zona d’El Muelle dende’l vienres 18 y a partir del xueves vivióse una frenética actividá qu’arrancó col XXX Concursu Oficial d’Echadores de Sidra d’Asturies, que ganó l’ecuatoguineanu Salvador Ondó (Tierra Astur).

El mal tiempu impidió que’l vienres se superara un añu más el récor d’escanciáu na sablera d’El Natahoyo, afitáu en 9.796 persones, anque 6.354 valientes acudieron a la cita pa pasar un bon ratu. L’agua tamién apaeció’l sábadu, deslluciendo los cancios de chigre na Plaza Mayor, pero nun faltó xente p’acompañar a la Sociedad Torner cola so voz.

La xornada final dexó a Sidra Camín (Trabanco) como ganadora del Eloxu d’Oru, que reconoce a la meyor sidra del certame a xuiciu del xuráu profesional, y a Val de Boides (Llagar Castañón) cola Etiquetina Más Guapa. Mentes, Angones recibió un merecíu homenaxe y l’aplausu del públicu que pudo disfrutar de la preba de la bébora de los llagares participantes nesta edición de la Fiesta de la Sidra Natural de Xixón, qu’esti añu dexó de ser de baldre.

Na imaxe, un momentu de la entrega del Eloxu d'Oru, cola alcaldesa detrás. Semeya del Facebook de Carmen Moriyón.