Ruma Barbero firma exemplares de 'Aguantando Cachones 2' nel Atenéu Obreru

|
Ruma Barbero firma exemplares de 'Aguantando Cachones 2' nel Atenéu Obreru

El dibuxante presenta en Xixón la segunda parte d'esta serie y la reedición de 'Manzajú'.

Ruma Barbero ta acabante d'espublizar 'Aguantando cachones 2', llibru que recueye histories y anéudotes de la vida del dibuxante y músicu y que davezu suel xubir al fanzine dixital de mesmu nome. Asina, apaez l’homenaxe que-y ufierta al so tíu Miguel, perimportante a lo llargo la so vida, y dellos cómics nos que rescamplen el compromisu de xixonés pa cola llingua asturiana, desfaciendo dellos xuicios y prexuicios que se sienten sobre ella, denuciando l’esfarrapamientu de la toponimía o la persecución de les  asociaciones culturales asturianistes, amás de  l’alcordanza pa colos desapaecíos pola represión franquista y delles pingarates de la so vida familiar y estudiantil en Salamanca.

A esta obra espublizada por Tierra Llibros súmase tamién la reedición de 'Manzajú', creación ganadora del primer Premiu Alfonso Iglesias de cómic, correspondiente al añu 2009. L'actu, nel que Barbero va firmar llibros a les persones interesaes, va celebrase mañana, a les 19.30 hores, nel llocal social del Atenéu Obreru de Xixón (Cuadonga, 7).

Contador Estadistiques