POEX naz pa llevar alcuentros poéticos per espacios de la ciudá

La primer edición va ser finalmente en llinia dende'l miércoles poles restricciones nueves pola situación de la pandemia de COVID-19.

La Fundación Municipal de Cultura, Educación y Universidá Popular estrena esta seronda l'Alcuentru de Poesía en Xixón (POEX), que naz con intención de continuidá pa llevar alcuentros poéticos per tola ciudá d'una manera diferente, combinando'l testu cola música y la imaxe. Ente los convidaos va haber presencia de dellos autores en llingua asturiana, como ye'l casu de l'actividá inaugural, prevista pa les 19 hores d'esta tarde na Escuela de Comercio con Xaime Martínez, Marta Mori y Gonzalo G. Barreñada.

Finalmente esta actividá va contar con públicu, non asina les siguientes poles restricciones nueves pa tratar de controlar la pandemia de COVID-19, que se van poder siguir na canal de YouTube de la Rede Municipal de Biblioteques. Hasta'l domingu van entamase sesiones nueves tolos díes cola participación de creadores de dientro y fuera del país cola sonadía de Xuan Bello, Santiago Auserón, Pablo Antón Marín Estrada o Miguel Rojo.