Podemos-EQUO va decidir n'asamblea si apoya a González

|
Podemos-EQUO va decidir n'asamblea si apoya a González

La coalición confirmó que nun va presentar a la so candidata nel Plenu d'investidura.

El PSOE aconceyó ayeri con Podemos-EQUO dientro del ciclu d'alcuentros que ta calteniendo con tolos partíos na so sede. De la xunta sacó nidio que moraos y ecoloxistes nun van poner torgues nel camín hacia l'alcaldía d'Ana González.

Asina, nin van dar l'apoyu a otros candidatos nin van presentar a Yolanda González Huergo nel Plenu del día 15, optando pola astención o pol votu a favor de la socialista. Esto último dependerá de la decisión de l'asamblea convocada por Podemos-EQUO esti xueves nel Colexu Públicu Xovellanos.

L'apoyu a González, sicásí, taría condicionáu a alcuerdos concretros, como la renta social, la gratuidá de les escueles de 0 a 3 años o la remunicipalización de l'ayuda a domiciliu. La socialista, mentes, ufrió ayeri alderique “serenu y seriu” p'abordar los temes que serán claves pa Xixón mientres el mandatu.

“Nun se trata de zarrar un númberu de midíes determinaes, sinón de dir trabayando nos retos que la ciudá tien per delantre”, añadió la ex conseyera d'Educación, Cultura y Deporte, qu'agradeció'l tonu cordial de los representantes de Podemos y EQUO, con González Huergo en cabeza y cola presencia de Mario Suárez del Fueyo, secretariu xeneral de Podemos Xixón y ex voceru de Xixón Sí Puede.

Contador Estadistiques