Otru San Xuan ensin quemes

La situación sanitaria pola pandemia de COVID-19, que llenda los eventos multitudinarios, impide la celebración de la foguera pa San Xuan na sablera d’El Natahoyo asina como otres entamaes por coleutivos vecinales. Sí va haber enramáu de fontes y baille tradicional en dellos barrios de la villa y parroquies del conceyu.

Esta tarde va entamase col engalanamientu de fontes, tradición mui venceyada a San Xuan. A les 20 hores el Grupo Folklóricu Trebeyu va encargase de la del Parque del Gas, Xiringüelu de la Isabel II de Cabueñes, Alegría del Llavaderu de Porceyo, Los Xustos de la del Llavaderu de la ermita de San Miguel de Dueñas de Castiello Bernueces, l’Asociación Coros y Danzas Jovellanos de la de Los Campinos y Flor de Xaranzaina na plaza Clara Ferrer d’El Polígono, mentes que’l Grupo Folklórico El Xolgoriu va facelo a les 20.30 hores nel parque de Laviada.

Yá mañana, hores enantes de San Xuan, va entamase’l tradicional enramáu de la fonte de Pelayo, na plaza’l Marqués, del que va encargase un añu más Andecha de Cultura Tradicional Na Señardá. Nesi mesmu momentu Trebeyu va tar nel Llavaderu de Deva, Coros y Danzas del Real Grupo de Cultura Covadonga nel parque de La Guía, Jovellanos otra vegada en Begoña, La Alegría en La Pipa, Flor de Xaranzaina nel parque Viesca de Munieḷḷos, Excesior en Llantones, El Turruxón en Trubia y la Banda Gaites Villa de Xixón na sablera de L’Arbeyal, mentes qu’a les 20.30 hores Xolgoriu va facer lo propio nel parque Vicente Ferrer de Montevil.

Foguera virtual

El Conceyu, a falta de fogueres físiques, va entamar una foguera virtual como alternativa nesti enllaz. Agora tien un contador que marca’l tiempu que falta pa la medianueche de mañana, momentu nel que se va activar la quema y se va entamar la Danza Prima.