Los Premios Lliterarios y el Nel Amaro de teatru entréguense en Xixón

|
Gala entrega Premios Lliterarios 2020 actuación

LLABoral Centru d’Arte y Creación Industrial va acoyer la gala d’entrega de los Premios Lliterarios 2021 y el Nel Amaro de teatru profesional que convoca la Conseyería de Cultura, Política Llingüística y Turismu. L’actu va contar cola actuación musical del dúu folk ribeseyanu Baxel.

Los ganadores de los siete gallardones que conformen dende l'añu pasáu los Premios Lliterarios, cola incoporación del de narrativa moza y traducción, y el de teatru van entregase mañana na gala que va tener llugar na nomada sala 'chill-out' de LLABoral Centru d'Arte y Creación Industrial, a les 17.30 hores, cola presencia de la conseyera Berta Piñán y el direutor xeneral de Política Llingüística, Antón García. Ye'l segundu añu en que Xixón acueye esta cita colos meyores creadores del 2021 que participaron nos diferentes concursos convocaos.

José Ángel Gayol, con ''La cafiante muerte de Nicolai Bostov' (XLII Premiu Xosefa Xovellanos de novela); Pablo Texón, con ‘Cantar de ti mesma’ XXVII Premiu Xuan María Acebal de poesía; Ramón d'Andrés, con ‘Una ciencia ensin enfotu’ (XXVII Premiu Máximo Fuertes Acevedo d'ensayu); Xilberto Llano, con ‘Boliescritu de primavera’ (XIV Premiu María Josefa Canellada); Ángel de la Calle, con ‘Paez que nun foi ayeri’ (XIII Premiu Alfonso Iglesias de cómic); y Blanca Fernández, con ‘No que cinca los seres de lleenda’ (I Premiu Enriqueta González Rubín de narrativa moza), son los ganadores d’esta edición, a los qu’hai que sumar los responsables de la Biblia, tornada al asturianu por un equipu d'una trentena de persones, que reciben el I Premiu Florina Alías a la meyor traducción. Producciones Nun Tris, mentes, merez el V Premiu y Festival Nel Amaro de Teatru Profesional en Llingua Asturiana o Gallego-asturiano por ‘La reina la guapura de Leenane’.

Xunto cola entrega de la estatua conmemorativa y les pallabres de los premiaos, la gala va contar con una actuación de Baxel. El dúu folk ribeseyanu, qu'asoleyó recién el so primer trabayu, 'El cantar del Simpatías', va pesllar la cita.

Na semeya, un momentu de la gala del añu pasáu.

Contador Estadistiques