Los parques infantiles tornen a vaciase hasta la 'normalidá nueva'

El vienres pasáu les neñes y neños de Xixón pudieron disfrutar otra vuelta de los parques infantiles de la ciudá. Sicasí, el Gobiernu treslladó al Conceyu qu’hasta la fin del estáu d’alarma, esto ye, hasta’l domingu, nun van poder ser emplegaos pola reciella.

Na mañana del sábadu en rueda de prensa’l presidente Adrián Barbón adelantó la intención del so Executivu de contautar col Ayuntamientu de Xixón pa tratar esti axuntu. La cuestión yera l’artículu 4.2 de la Orde SND/370/2020 del 25 d’abril del BOE que recueye que “nun tará permitíu l’accesu a espacios recreativos infantiles al aire llibre, asina como a instalaciones deportives” nel “estáu d’alarma y les sos posibles prórroges”.

Tres el contautu ente dambes alministraciones, el Conceyu zarró otra vuelta los parques porque “hai que cumplir la normativa, yá qu’ún de los ésitos d’Asturies foi precisamente cumplir”. Al entrar na fase 2 yá se pudo usar les instalaciones deportives, polo que’l gobiernu municipal “entendió que cayera l’artículu completu”, decidiendo abrir los parques infantiles por considerar “prioritaria la necesidá de socialización de los menores, a la que numberosos especialistes apellen”.

Finalmente, l’apertura va facese’l domingu, día na que fina l’estáu d’alarma impuestu’l 14 de marzu pola crisis sanitaria pola pandemia de COVID-19. Asturies va entar, asina, na 'normalidá nueva' hasta la llegada d'una vacuna o un tratamientu eficaz contra la enfermedá causada pol coronavirus SARS-CoV-2.