“L’idioma nun puede quedar sólo pa cuestiones dependientes de Cultura”, recuerda Llera

Iniciativa pol Asturianu tresmitió al Conseyu Asesor de la Llingua’l so esmolecimientu pola ausencia del asturianu en campañes del Conceyu, poniendo como exemplu la de ‘Conecta Gijón’. “L’idioma nun puede quedar sólo pa cuestiones dependientes de la Conceyalía de Cultura”, recuerda Iván Llera, presidente del coleutivu.

“Como n’otres ocasiones, pidimos que l’asturianu tenga una fonda presencia en tola actividá municipal en campañes de la EMA, EMULSA o de Deportes. Dende Iniciativa vamos trabayar pa insistir nesta cuestión y que seya importante nel llabor de gobiernu del Conceyu y que’l Plan de Normalización insista nello”, añadió’l periodista. El 22 de xineru pasáu aconceyó’l Conseyu Asesor, cuando se presentó’l borrador de Proyeutu de Plan de Normalización Llingüística 2020-2023, compuestu por 88 propuestes.

La organización punxo d’exemplu ‘Conecta Gijón’ que s’instaló nel Paséu de Begoña p’amosar a la ciudadanía les posibilidaes del Internet de les coses na xestión de les ciudaes, campaña na que s’emplegó sólo’l castellanu y la toponimia castellanizada. “Creemos que sería bien interesante que nuna campaña na cai, interactiva y con tanta visibilidá tuviera presente l’asturianu. L’idioma nun puede quedar sólo pa cuestiones dependientes de la Conceyalía de Cultura”, recordó.