L'Holtelcur nun pudo llograr la Copa d'Europa en Xixón

El CP Voltegrà venció na final por 1-0.

Nun pudo repetise'l resultáu de la final del 2010 col Alcorcón (5-2), y nesta ocasión los aficionaos del Hostelcur vieron como la Copa d'Europa femenina de ḥoquei patinos viaxaba a Catalunya. La culpable foi precisamente una xixonesa de la cantera del Hostelcur, Natasha Lee, autora d'un tantu nel minutu 10 del partíu que sería finalmente decisivu.

La final ente asturianes y el conxuntu de Sant Hipòlit de Voltregà yera la esperada por toos, una reedición de la final de la Copa de la Reina que les catalanes llevaron na prórroga por 3-2 hai quince díes. L'Hostelcur ganaba'l sábadu en semifinales al SL Benfica por 4-3 con un gol d'oru de Marta González na prórroga, mentes que'l Voltregà superaba a les sos paisanes del CP Manlleu por 5-2.

Apoyaes poles más de 2.000 persones qu'acudieron a la final d'ayeri, les de María Fernández Grande 'Pulgui' apretaron p'algamar el tantu que-yos diera l'empate, anque la falta d'aciertu y la bona actuación de la portera Vives fixo que la victoria cayera de llau visitante. Con esti trunfu, el Voltregà suma la so quinta Copa d'Europa, frayando la igualada col Hostelcur, que suma cuatro.

Queda la Lliga

Esta derrota ye la segunda de la temporada que sufre l'Hostelcur, yá que na OK Lliga sigue invictu y direutu al títulu. Les xixoneses son primeres con 48 puntos, cuatro más que'l so doble verdugu nes dos finales disputaes, el Voltregà, que tien un partíu más disputáu. El tercer clasificáu ye'l Generali Palau Plegamans, con 40 puntos.