Les obres de la escuela de Nuevu Roces van arrancar la primer selmana d’ochobre

Nueve aules d’Educación Infantil y dieciocho de Primaria, asina como árees pa nueves teunoloxíes, música y desdobles, ente otros espacios, va proporcionar la construcción de la escuela de Nuevu Roces tan demandada polos vecinos del barriu. Les obres van arrancar la primer selmana d’ochobre con un plazu d’execución de 24 meses.

La Conseyería d’Educación firmó güei cola empresa Citanias l’acta previa al entamu de la construcción del Colexu Públicu Nuevu Roces, incluyida nel programa operativu de los fondos europeos FEDER 2021-2027. Una actuación sobre 15.000 metros cuadraos d’una parcela asitiada na cai Benito Otero Martínez con una inversión de 16,52 millones, la cifra más alta dedicada na historia pol Gobiernu pal llevantamientu d’una escuela.

L’equipamientu, proyeutáu pol arquiteutu xixonés Jovino Martínez Sierra, va contar con una superficie construyida de cuasi 10.000 metros cuadraos distribuyíos en trés plantas sobre rasante y un suétanu, amás d’una pista deportiva semienterrada y cubierta con un planu verde y una grada. Va contar con nueve aules d’Infantil y dieciocho de Primaria, asina como árees pa nueves teunoloxías, música y desdobles, un ximnasiu, vestuarios, comedor, biblioteca, un salón d’actos con aforu pa 229 persones, sales de visita y despachos tanto para l’asociación de padres y madres como pa les alumnes y alumnos, ente otros espacios.

El diseñu del centru axústase a los criterios establecíos pola conseyería pa centros educativos nuevos de sostenibilidá y eficiencia enerxética, flexibilidá d’espacios, aplicación de metodoloxíes innovadores y apertura a la comunidá. Tamién va tener plena accesibilidá, con ramples con una inclinación inferior al 6 por cientu.