La viabilidá del actual modelu hiperconsumista, a debate na Sindical

Antonio Turiel y Antonio Aretxabala van poner la conferencia 'Crisis enerxética y de materiales: ¿qué facer?', entamada pola Sociedá Cultural Xixonesa y l'Atenéu Obreru de Xixón.

Mañana, a les 19 hores, va aldericase na Casa Sindical sobre la viabilidá del actual modelu hiperconsumista basáu nun crecimientu económicu esponencial, un debate qu'una gran parte comunidá científica cree imprescindible abrir a la sociedá. P'afondar nesti tema, les dos organizaciones conviden a dos voces autorizaes como Turiel, investigador del Conseyu Superior d'Investigaciones Científiques (CSIC), y Aretxabala, xeógrafu.

"Los combustibles fósiles permitieron nos sieglos últimos un ameyoramientu de les condiciones de vida y confort ensin precedentes. Pero esta esceicionalidá paez que llega al so fin, tanto pel llau de la estraición (asina lo amuesa'l picu del petroleu y d'otres sustancies y materiales), como, sobre manera, pel llau de les emisiones. L'avance continuu del cambiu climáticu y los sos impautos yá condicionen la realidá actual. Estos fechos amenacen con convertir el suañu en velea", apunten los entamadores de la conferencia.

"Son munchos los interrogantes sobre qué vendrá y cómo incorporalo. La esperanza de les enerxíes renovables na llamada 'Transición Verde' impulsada poles instituciones pa 'camudalo too ensin que nada camude' xenera series duldes una parte importante de la comunidá científica", sigue la presentación de la intervención, que fina señalando que "tamos quiciabes énte una de les encruciyaes más importantes de la historia de la humanidá, yá qu'afeuta de manera direuta al futuru del nuesu planeta y tamién de la nuesa sociedá".