La música tradicional toma’l Muséu del Pueblu d’Asturies

Esti sábadu va entamase nel Muséu del Pueblu d’Asturies ‘Música nel Muséu’, un alcuentru de música tradicional qu’ufre cinco actuaciones nel tendayu y una clase maestra de pandereta. Les actividaes van principiar a les 10 hores y van allargase tola xornada nel recintu.

Ramsés Ilesis va ser responsables de la masterclass de pandereta a les 10 hores, pa les qu’hai 10 places disponibles. Ésta va allargase 3 hores y va tener llugar al aire llibre o nel aula didáutica, dependiendo del tiempu.

Al meudía van encargase d’abrir nel tendayu les actuaciones El Carreru & Blanco, dúu formáu por Pablo Carrera (gaita) y David Varela Blanco (acordión y voz) que va facer un percorríu pela música tradicional baillable d’Asturies per una hora. Darréu Ambás y Ramsés van interpretar temes tradicionales col acompañamientu de la pandereta, el panderu o’l tambor.

Yá de tarde, a les 17 hores, Xeitu va presentar ‘15 años con Xeitu’, el primer discu d’esti grupu de baille tradicional qu’estrenó en payares del 2019. Va tomar el relevu, a les 19 hores, Algaire, grupu formáu poles pandereteres Iratxe Espina, Carla Miranda y Loreto Suárez, y el guitarrista Juan Yagüe, qu’ufre un repertoriu variáu de música tradicional del norte peninsular, que prepara discu de debú.

Van poner el ramu a la xornada, a les 20.30 hores, Caldo y Os Rabizo. La bandina del occidente va trayer un repertoriu baillable del Eo-Navia pa finar la xornada de la manera más animada posible.

L’asistencia a les actividaes de ‘Música nel Muséu’ ye de baldre, siendo necesaria inscribirse previamente. Pue facese hasta les 19 hores d’esta tarde nel númberu de teléfonu 985.18.29.60.