La hostelería pue ampliar el so horariu por mor de la celebración de Metrópoli

|
Metrópoli

La xunta de gobiernu aprobó qu’estos díes los establecimientos hosteleros puedan abrir hasta l’horariu que-yos permite la so llicencia en fines de selmana. Acepta asina un pidimientu de la patronal Otea pola celebración estos díes de Metrópoli, festival que fina'l domingu y que tien permisu d’apertura hasta les 4 de la madrugada.

Ayeri entró a valir esta decisión esceicional, que se va allargar güei y mañana. La fin de selmana la hostelería va poder trabayar tamién, como ye lóxicu, nel so horariu normal, esto ye, lo que marca la so llicencia pa vienres, sábados y viéspora de festivu.

La postura del Conceyu básase nel artículu 2 de la ‘Ordenanza Municipal sobre l’Aplicación d’Horarios a Establecimientos, Llocales y Instalaciones pa Espectáculos Públicos y Actividaes Recreatives n’Atención a les Fiestes Llocales y Eventos Singulares’. Ésti afita que se podrá autorizar un máximu de cincu díes nos se pueda ampliar dichu horario en función de la celebración d’espectáculos o actividaes singulares, como ye’l casu de Metrópoli, certame que se ta celebrando estos díes nel Recintu Ferial Luis Adaro, mentes que l’artículu 3 marca qu’ha ser en base a la llicencia pa díes de fin de selmana.

Dende’l vienres pasáu y hasta’l domingu entámense conciertos nesti festival d’artistes y bandes estatales y internacionales, y llueu la fiesta allárgase nes munches carpes instalaes con música en direuto o pinchaes. Nos díes próximos va pasar pel llugar Taburete, Rulo y la Contrabanda o Beret, ente otros.

Na semeya, Metrópoli ayeri dende l'esterior del recintu.

Contador Estadistiques