La construcción del cinco estrelles lleva al valtu del edificiu de la sede vieya de l'Autoridá Portuaria

L'Ayuntamientu anunció'l proyeutu de la primer instalación hotelera d'esta categoría nel conceyu, que va asitiase n'El Muelle.

Xixón por fin va contar con un cinco estrelles, pero va ser a costa de valtar l'edificu de la sede vieya de l'Autoridá Portuaria, hasta va unos meses cola fachada protexida. En payares el Conseyu de Patrimoniu accedía a rebaxar d'ambiental a ambiental documental el so nivel de proteición, lo que da pie al propietariu del edificiu dende'l 2015, Apartamentos Miramar del empresariu asturianu Fermín Mora, a valtalu pa llevantar ún nuevu de similar altura, pero configuración que facilite 120 cuartos, númberu imposible cola construcción actual.

El papel del Conceyu nesta actuación privada presupuestada en 21 millones d'euros va ser la puesta en marcha de los trámites necesarios pa la execución del proyeutu, esto ye, la modificación del Plan Xeneral d'Ordenación (PXO), del Catálogu Urbanísticu y del Plan Especial de Reforma Interior (PERI) de Cimavilla. La operación tamién prevé la eliminación del edificiu de Sanidá Esterior y la conversión de la torre de control, perteneciente a Demarcación de Costes, n'apartahoteles, anque estes operaciones nun tán pesllaes, asina como la construcción d'un aparcaderu soterrañu pa cerca d'un centenar de places y un establecimientu hosteleru.

Na semeya, imaxe presentada de cómo sería l'edificiu nuevu que sustituyiría a la sede vieya de l'Autoridá Portuaria.