La conceyalía de Festexos yá ta aplicando'l vetu al términu Xixón

"Xixón Branu", presente nel 2022, desapaeció del títulu del videu promocional del 2023.

La conceyalía de Festexos, en manes de VOX, yá ta aplicando'l vetu al términu Xixón qu'anunciara en prensa la so responsable, Sara Concepción Álvarez Rouco: “A partir de ahora, ‘Gijón’”. Dos díes enantes d'esa declaración, nel primer día hábil depués de la investidura de Carmen Moriyón como alcaldesa, facíase efeutiva esa intención.

La cuenta de YouTube de Festexos, 'Festejos Gijon' cola direición @FestejosGijon-Xixon, asoleyaba un videu promocional del branu xixonés baxo'l títulu 'Gijón Verano 2023'. Un añu enantes, el 22 de xunu, xubíase ún asemeyáu, anque de más llargor, baxo'l títulu 'Gijón Verano 2022 | Xixón Branu 2022', mesma fórmula que la emplegada nel 2021.

D'esta forma vese cómo Álvarez Rouco sí fai efeutiva la so intención de desaniciar el topónimu Xixón, oficial na forma billingüe 'Gijón/Xixón dende'l 2006, en tola actividá del so departamentu. Dende ámbitos de la cultura y la sociedá civil xixonesa ta pidiéndose a l'alcaldesa esos díes últimos que frene la deriva escluyente y la persecución al asturianu y a otres espresiones de diversidá.