La Comisión de Siguimientu del Plan de Normalización Llingüística va aconceyar trés vegaes en 2 años

L’equipu de gobiernu comprometióse nel Plenu a convocar la Comisión de Siguimientu de Normalización Llingüística nel plazu máximu d’un mes llueu d’un ruegu al respeuto de Podemos-EQUO. Creáu en marzu del 2011 a partir del Conseyu Asesor de la Llingua col mandáu d’axuntase cada 3 meses, ésta va ser la tercer vegada qu’aconceye.

El so llabor ye revisar el III Plan de Normalización Llingüística 2020-2023 y dar a conocer la evolución del mesmu enantes de que fine’l mandatu. Laura Tuero, vocera de la coalición, recordó que, amás de namái axuntar en dos ocasiones, l’últimu alcuentru “tuvo una duración de malpenes un cuartu d’hora, dalgo ablucante teniendo en cuenta que’l Plan de Normalización propón cuasi un centenar de midíes”.

Considera que’l documentu aprobáu colos votos de PSOE, Izquierda Xunida, Podemos y Foro “ufría una bona oportunidá pa dir abriendo camín, nel ámbitu municipal, al reconocimientu efectivu del asturianu, que ye una ayalga, un tesoru cultural, un heriedu patrimonial de la ciudadanía xixonesa, de la población asturiana y del mundu enteru, porque les llingües, toes y caúna d’elles, son patrimoniu inmaterial de la humanidá”. Sicasí, llamentó que’l mentáu Plan acabara siendo “una oportunidá perdida, una más, pa protexer y da-y puxu, nesti casu nel ámbitu de l’Alministración llocal, a los derechos llingüísticos de les y los xixoneses que sienten l’asturianu como la so llingua propia o como una de les sos llingües propies”.

En total el Plan recueye 93 actuaciones, con fecha marcada d’aplicación, p’avanzar nel usu del asturianu en cinco estayes: Alministración pública; enseñanza, tresmisión familiar y mocedá; socioeconómicu (comerciu y hostelería); ociu, deporte y actividá cultural; y medios de comunicación y nueves teunoloxíes. Otra manera, Tuero tamién señaló que “echamos en falta una presencia tresversal de la llingua na aición de gobiernu municipal” y apuntó que "ye mui sintomáticu'l fechu que l'usu del asturianu nes intervenciones del equipu de gobiernu foi práuticamente nulu".

De 3 a 6 meses

La Comisión de Siguimientu de Normalización Llingüística debía de convocase cada 3 meses, polo que nestos dos años tendrá de llevar 8 conceyos, pero'l que se comprometió l'equipu de gobiernu nel Plenu del miércoles va ser el terceru. El conceyal de Cultura, Manuel Ángel Vallina, anunciara n’ochobre la so intención d’ampliar el plazu de convocatoria de 3 a 6 meses.

Na imaxe, Tuero nel momentu de presentar el ruegu nel Plenu.