Escenines pa la Reciella programa trés espectáculos n'asturianu pa neñes y neños

El patiu del Centru de Cultura Antiguu Institutu acueye en Navidá les funciones, con accesu de baldre hasta que se complete l'aforu.

Escenines pa la Reciella, un clásicu de les vacaciones navidiegues en Xixón, llega un añu más con trés propuestes n'asturianu pa neñes y neños. Trés espectáculos que van ponese ente esta tarde y el vienres, siempre a les 19 hores.

La primera obra ye 'La neña de les trences del revés', d'El Callejón del Gato, una versión del popular cuentu d'Iris Díaz Trancho. Mañana va llevar a escena Teatro del Cuervo 'Ágada, guardiana de la viesca', una historia sobre lleendes y mitoloxía, y el vienres Guayominí Producciones 'Cuidáu coles palabres', con dos bibliotecaries como protagonistes.

'Reciella. Families pol Asturianu', que vien entamando esti festival d'artes escéniques n'asturianu dende'l 2013, cuenta nesta edición cola collaboración del Conceyu y del Gobiernu al traviés del programa 'Asturies, Cultura en Rede'.