Ente Fueyes sigue colos alcuentros colos gallardonaos nos Premios Lliterarios del 2020

El ciclu Autores nel Camín aporta a la villa.

Llueu de les actividaes d'esta pasada ponte festival nel Mercado Artesano y Ecológico, 'Ente Fueyes. Ochobre Lliterariu' sigue cola so programación. Agora ye'l turnu de los alcuentros colos ganadores de los Premios Lliterarios 2020 que convoca la Conseyería de Cultura, Política Llingüística y Turismu.

Xune Elipe, ganador del XXVI Premiu Máximo Fuertes Acevedo d’ensayu por ‘Hai una llinia trazada. Historia de la música asturiana’, va poner la conferencia 'Hai una llinia trazada…' esta tarde a les 19 hores na sala de conferencies del Centru de Cultura Antiguu Institutu. Nella fai un percorríu pela historia de la música d’espresión asturiana dende l’antigüedá hasta anguaño, pa lo qu'emplega un formatu cronolóxicu, mui dinámicu, apoyándose en materiales audiovisuales.

El salón d'actos de la Escuela de Comerciu va acoyer los cuatro siguientes alcuentros, toos tamién a les 19 hores. El martes va ser el turnu d'Alejando Fernández-Osorio, merecedor del XXVI Xuan María Acebal de poesía por ‘Tayu’, pa siguir el xueves viniente con Sidoro Villa, vencedor del XLI Premiu Xosefa Xovellanos de novela por 'El fervinchu’. Completen esti ciclu Alberto Vázquez, que con ‘El sol na escombrera’ convenció al xuráu del XII Premiu Alfonso Iglesias de cómic, el martes 26, y Vero Suari y Inaciu Galán, coautores de ‘La curuxa Catuxa’, la historia qu’algamó’l XIII Premiu María Xosefa Canellada de lliteratura infantil y xuvenil, el xueves 28

Les xornaes entamaes pola Fundación Municipal de Cultura, Educación y Universidá Popular complétense'l martes 2 de payares, nel antepar del segundu pisu de la Escuela de Comerciu, cola presentación del númberu 37 de la revista 'Lliteratura' de l'Academia de la Llingua Asturiana.